ملفات. وملفات. من غير. ملفات وهات
بقلم /أيمن بحر
تيجي تحط إيدك في ملف الغذاء يطلع لك خمسميت مافيا.. مافيا الدواجن و مافيا اللحوم و مافيا الأسماك و مافيا السكر..
تيجي تشتغل في ملف الأدوية و المستشفيات يطلعلك مافيا شركات الأدوية و المستشفيات الخاصة..
تيجي تدخل المحليات تحس إنك دخلت جحر حيات سامة..
تيجي تشيل القمامة و تنضف الشارع يطلع لك مافيا القمامة و عصابات إعادة التدوير الغير قانوني و أرباب غسيل الزجاجات البلاستيك و تعبئتها مياه من الحنفية تحت السلم و بيعها على إنها معدنية..
تيجي تشتغل على العملة يطلعلك عصابات السوق السودا و تجار العملة..
تيجي تتفرج على فيلم يطلعلك عصابات و بلطجية و زنا محارم و قلة أدب و ألفاظ بذيئة سوقية..
تيجي تشتري خضار تتغش في الميزان.. تشتري جريدة تلاقيها بتكذب و كلها شائعات..
تيجي تحط ايدك في ملف الخبز يطلعلك مافيا المخابز.. تيجي تزرع قمح فالمافيا تبيعه و تختلس ثمنه..
تيجي تذاكر و تطلع الأول يطلعلك “ابن الدكتور” اللي حيبقى معيد غصب عنك و انت تترمي في وحدة صحية مليانة حشرات في قرية مش على الخريطة..
تيجي تتجوز يطلع لك أب و أم عايزين يبيعوا بنتهم للي معاه و قادر يدفع أكثر..
تيجي تخلف تطلعلك مافيا المدارس الدولية اللي بتدفع لمافيا أخرى في المدارس العادية و المعاهد القومية عشان يدخلوا الحصص و مايشرحوش كلمة..
تاخد ابنك توديه لمدرس فيطلعلك مافيا الدروس الخصوصية.. تروح مصلحة حكومة فيطلعلك موظف وصل شغله الساعة 9 و فطر في ساعة و مشي 12 لأنه “الساعة بقت 12 يا استاذ”.. أول موظف في التاريخ بيشتغل ساعتين يوميا و يقبض راتب كامل..
تشغل التليفزيون تلاقي نفسك وسط مافيا الإعلام و اللوبيهات السرية و العصابات اللي بتحاول تلم إعلانات و دعاية على حساب دمك و أمنك و حياتك..
تدخل بقى السوشيال ميديا و تنزل الشارع تلاقي كل دول بيشتكوا من الجشع و الفقر و الغلاء و الأسعار…
